鹽田梓又叫鹽田仔；「梓」指鄉里，有不忘故鄉既意思。早喺二百幾年前，客家陳氏三兄弟喺呢度建村，主要以曬鹽、耕作、捕魚同畜牧為生。後人陸續遷出小島，有啲移民去外國，有啲就去咗市區住，於是鹽田梓就被荒廢幾十年。多年之後仲心繫自己既村民後代，終於係2010決定將呢條客家村重新活化，將昔日鹽田梓既風光重新展現。島上仲有義工係鹽田當值帶領參觀團，向遊人介紹造鹽既過程同島仔既歷史。
好多時去其他島都一定會見到廟，但係呢度呢，就只有一間天主教堂；喺碼頭落船，抬起頭望就會見到。原來呢條隱世村落係香港天主教嘅發源地，村內曾經有好多屋都係修士以前住既地方。沿住入村方向，可以行到鹽田梓文化資源展覽室（舊澄波學校）參觀、隔離條樓梯上去就會到達聖約瑟教堂。
另外，紅樹林亦都係呢個小島既另一重點。整片紅樹林覆蓋淺灘，入面物種豐富多樣化，仲六個香港獨有既品種，有時間不坊停低細心觀察下呢個大自然奧妙既生態系統。島上亦有好多樟樹，係村既代表，據說以前村民女兒出嫁都會送樟樹製品作嫁妝，代表住家裡對新娘既祝福。
一路向村入面行，慢慢可以行到上頂，有涼亭可稍作休息，仲可以遠眺到對岸山頭。
過咗涼亭從另一方向落山會行到去一條必定會去打咭既橋——玉帶橋。呢座橋用作連接滘西洲，由於對面已經成為私人高爾夫球場，一般行到橋既盡頭就會往回走，沿住路邊指示牌就可以行返出鹽田然後返回碼頭。
