第一站係環境資源中心，呢度原址係舊灣仔郵局，1915年正式啟用，係香港歷史最悠久既郵局！呢棟L型建築物1990年被列為法定古蹟，1993年經過活化成為現時既環境資源中心，又名『環保軒』。環保軒既裝修秉承環保既原則，善用郵局資源，例如儲物櫃和檯。同時不忘保留歷史痕跡，包括一排排舊式紅郵箱，感覺返到六七十年代既香港。原來以前一棟唐樓未必個個單位都有獨立郵箱，有住戶因為私隱問題，會去所屬區分既中央郵局申請一個郵箱。
至於環境資源中心，係由環境保護署聯同綠色力量營運，入面有大量關於保育同環境管理書目，亦有最新既環評報告俾公眾覽閱。
順帶一提，環保軒外面備有飲水機一部，俾公眾補充水分。平日自備水樽去灣仔行街既各位，不妨當『環保軒』一個歇腳補給站。
踏出環保軒後門，原來都大有來頭！呢個小花園前身係衛生局宿舍花園。抬頭一望，可以見到一棵粗壯既大樹，為街坊遮陰。唔好睇少佢呀，其實佢係超過一百歲既芒果樹。不過街坊報料話樹上芒果酸到震，跌落黎都無人食喎～
紅、橙、黃、綠、青！呢度仲唔係必影彩虹唐樓！只要企係對面街，就可以輕鬆影到五種顏色。之後行入街口，就可以見到裝修緊既藍屋。藍屋係香港一級歷史建築，可以話係灣仔地標。不過唔緊要，可以去隔離既香港故事館，一睹藍屋模型同昔日風采。香港故事館由灣仔聖雅各福群會開設，展出以往灣仔民間生活用品，並透過影片、音樂播放等多媒體俾大家懷緬一下。
最後最後，仲想介紹埋灣仔Green common店，入面賣好多素食食品，有近排好hit既ben & jerry's純素雪糕。重點係！！有部單車發電機，俾大家免費踏單車幫手機充電，踩得快慢會有一條發光能量捧顯示。筆者踩到白燈著左，大家敢唔敢去挑戰下？😎 不過留意返每人限時5分鐘，要自律呀！
