東龍島可分為行山同露營兩部分，今次就講吓露營嘅部分先喇，行山就留返下次喇。
東龍島嘅營地景色優美，而且有啲露營嘅朋友會選擇喺山上面露營，人在山上，風景就更加無敵喇。另外，營地附近仲有一個「東龍島炮台」。根據紀錄，呢個炮台於康熙年間(1662 年 至 1722 年 )建造，作為防禦海盜之用。炮台遺跡到咗而家仍然有保存落嚟，仲有一間用作介紹嘅小屋添，大家都可以去睇吓，增廣見聞。除咗露營，東龍島亦係玩攀岩同飛索嘅勝地，到咗秋冬嘅時候，就會有好多人係到玩㗎喇。
到咗夜晚，喺天氣好嘅情況下，大家可以睇到好多星星，仲可以欣賞埋遠方嘅城市夜景添！如果想沖涼，亦都可以去士多嗰度，凍水免費，而熱水就要$10。
當然啦，東龍島營地嘅附近除咗炮台，仲有好多自然環境可以睇㗎，例如肚臍洞、噴水岩同石刻。有關石刻嘅介紹，就留返行山篇嘅時候講喇。
最後，最重要嘅梗係不留痕喇！唔好留低任何垃圾，就算到上面有垃圾筒，都唔好抌喺嗰度喇，因為人哋要幫你執走㗎嘛，自己垃圾自己帶走，好好保護東龍島上嘅一片樂土。
