東涌炮台位於東涌道旁邊，建於清朝道光十二年(1832年)，建造嘅目的係為咗阻止鴉片貿易及海盜侵略。因為佢可以有效咁控制海上交通，因此擁有好重要嘅戰略價值。及後喺1898年荒廢，並喺1979年正式列入香港法定古蹟。宜家炮台仍然保留咗六支大炮，極具特色，因此吸引到唔少人嚟到炮台打卡。除此之外，炮台嘅城牆係用石磚砌成，喺香港好少見，因此亦都係炮台嘅一大特色。炮台嘅規模唔算好大，好快就可以行完一圈，所以唔會好辛苦。而且炮台入面亦都設有資源館，介紹炮台同埋周邊地區嘅歷史，相信中意文化同歷史的人一定會被炮台吸引！大家不妨睇下邊個角度影得最靚啦！
東涌侯王古廟建於1765年，屬於三間二進嘅傳統格局，供奉咗宋朝將領楊亮節。相傳嗰時發生疫症，東涌嘅居民特登喺九龍城邀請楊侯王嚟驅除瘟疫，並且建廟祀奉，廟內更保存左建廟嗰陣鑄造嘅銅鐘。侯王古廟除左有歷史價值之外，佢嘅建築亦都好特別，屋頂上面有好精緻嘅雕刻，係咁多個人物當中，係有兩個著住洋服而唔係唐裝，唔知眼利嘅朋友仔又搵唔搵到呢？
去完侯王古廟之後，可以經過逸東邨向馬灣涌村進發。馬灣涌村係東涌嘅一條小漁村，可以係嗰度搵到一啲舊式嘅士多同商店。因為馬灣涌仍然未被發展，所以同附近的高樓大廈形成好強烈嘅對比，更加保留到傳統嘅漁村面貌。(編按：識得有啲住東涌嘅朋友都唔會專登行去馬灣涌，可想而知，馬灣涌都幾與世隔絕。)
呢條小村落風景怡人，近望昂坪360纜車及機場，遠望鳳凰山，因此成為咗影相取景嘅好地方。唔單止有靚景睇，馬灣涌村位於東涌灣嘅潮間帶入面，所以孕育左好多動植物，例如紅樹林、招潮蟹同彈塗魚等，生物多樣性十分豐富，潮退嗰陣更加可以到泥灘上面行下，探訪下唔同嘅野生動物呢！不過大家睇還睇，唔好手多多騷擾啲動物呀！