.jpeg)
春天：淡雅 - 河津櫻
春天係櫻花嘅花期,而係大埔海濱公園嘅草地滾球場附近就種植咗幾棵櫻花,雖然規模一定唔夠日本或者韓國咁大,但係盛開嗰陣都吸引到唔少攝影發燒友嚟影相㗎!花瓣淡淡嘅粉紅色同天空夢幻嘅藍色簡直係 perfect match!
夏天：艷麗 - 鳳凰木
相信大家對鳳凰木都唔會陌生,對大埔嘅居民更係十分親切添!林村河近寶鄉橋兩旁都種植咗唔少鳳凰木,一到夏天佢地就會爭艷鬥麗,紅色嘅花朵更加係超級 eye-catching!所以話鳳凰木係大埔其中一個 icon 都唔過份呀!唔止林村河,大埔海濱公園嘅正門都種植咗唔少鳳凰木,綠色嘅葉同紅色嘅花形成強烈對比,為公園增添咗唔少生氣。
秋天：對比 - 楓香
大家都知道元朗嘅大棠一向都係睇紅葉嘅勝地,嗰度有一大片嘅楓香林,如果唔想同人迫,其實香港仲有唔少地方可以搵到楓香㗎!位於大埔郊區嘅鳳園就係一個好例子,係通前往沙螺洞嘅樓梯旁邊都可以搵到紅葉嘅蹤影㗎!每到秋天,原來翠綠嘅樹葉都會變成紅色,點綴咗成個山頭!
冬天：傲骨 - 鐘花櫻桃
嘉道理農場嘅上山區種植咗唔少桃花同梅花,每當寒冬時節,桃花同梅花就會爭相綻放,為蒼茫嘅山頭增添生氣,係觀音山嘅桃花數量更係十分多!而農場為咗方便遊人賞花,更加會係花季定期更新花卉嘅開花指數,係咪好體貼呢?