沙橋村曾經係養蠔業重鎮。佢位於元朗最西北嘅角落，屬后海灣沿岸範圍，可以遠眺深圳南山區。沙橋村係非原住民村，處於鹹淡水交界，最適合養蠔。喺上世紀50年代之前，沙橋村村民就同對岸嘅深圳養蠔家族一齊合作養蠔。當蠔仔過左一個生長期之後，就好難再肥。所以沙橋村養蠔戶就會將蠔仔拖去深圳沙井度養。個度海水比較淡，令到蠔仔大得快Ｄ。但喺50年代中港邊界設立之後，兩地嘅合作就中斷左。今天，隨住養蠔戶退休﹑村民遷徙，昔日嘅蠔田變成左滿佈蠔殼嘅紅樹林濕地。
沙橋村下灣嘅陳祥記係村內碩果僅存嘅蠔戶。自宋代開始，佢地世世代代養蠔。一黎到蠔灘，就聞到陣陣蠔香。佢地堅持生曬金蠔，因為咁先可以保留蠔的鮮美。
行完沙橋村之後，可以繼續沿住深灣路去埋尖鼻咀同豐樂圍。尖鼻咀又名龜山，係米埔后海灣拉姆薩爾濕地嘅一部份。呢一帶係全港最大﹑全國第六大嘅紅樹林地帶。尖鼻咀嘅鷺鳥林更被評為「具特殊科學價值地點」，係香港最高級別嘅生態保育範圍。依加正值秋冬之際，仲有可能「野生捕獲」黑臉琵鷺。
過左尖鼻咀警崗後，沿住邊境路行，就會經過豐樂園。呢到有一格又一格嘅淡水魚塘，置身其中好似行緊移動迷宮，真係要望實個google map先出得番黎。
比起20年前，香港嘅魚塘已經消失左一半。近年，南生圍、豐樂圍等魚塘面對地產商發展威脅，後海灣沿岸嘅濕地亦不時傳出有人非法傾倒泥頭。大石﹑鋼根壓斷紅樹林，土地受到水泥嘅污染，侯鳥亦痛失家園。我地的「後花園」究竟仲要消失多幾多個？原來全港有成差唔多900個淡水魚塘，大部分遍佈新界西北。最為人熟悉嘅莫過於南生圍﹑大生圍。魚塘不但為我地提供新鮮食材，仲吸引唔同種類嘅候鳥黎覓食，豐富香港嘅生態面貌。行出去豐樂圍就係盛屋村，可以係到搭小巴番去。
