天然觀景台
三枝香係青衣最高嘅地方,擁有天然嘅地理優勢,自然可以望到遼闊嘅景色。向南面望,近至貨櫃碼頭、昂船洲大橋,遠至港島嘅中上環都盡收眼底。而望向東面就可以見到青衣市中心、荃灣同荔景一帶。一路沿住山徑行過三枝香嘅中峰之後,更加可以見到青馬大橋同油庫。
天然屏障
青衣大約有 200,000 人居住,人口密度相當高。而青衣嘅重工業同運輸業亦都好蓬勃,有大大小小嘅油庫、船廠同化學品倉庫,但係一但發生任何嚴重事故,將會對附近居民造成好大影響,三枝香正正起到一個天然屏障嘅作用。青衣有清晰嘅土地利用規劃,住宅同商業活動主要集中係東北面,而工業用地就位於南面同西面,中間隔咗座山,用意係減少危險品洩漏或火警對居民嘅即時影響。
