高地大草原
一見到昂平呢個名，唔知你會諗起啲咩呢？360、市集、天壇大佛？定係好似小編咁，諗起有得玩滑翔傘嘅大大片草原呢？吓，草原？無錯喇！因為今日要為大家介紹嘅，並唔係一般遊客都熟悉嘅大嶼山昂坪，而係馬鞍山嘅昂平高原。兩個昂平(坪)個名咁鬼相似，但就一個東一個西，到底點解呢？其實兩個地方都有十分相似之處，就係顧名思義，就係又昂又平。同大嶼山昂坪一樣，馬鞍山昂平屬於香港極之少有嘅高原地貌：喺高昂嘅山上面有一大塊平地，四處無遮無擋，大風到連樹都冇辦法生長，所以造就左一大片翠綠嘅草地。週末約哂成班朋友行上山野餐、影下文青靚相、吹下風吸下新鮮空氣，呢度的確係一個唔錯嘅選擇(自己垃圾自己帶走，好好好重要的)。
昂平高原下面就係西貢，企喺高原邊邊嘅崖上就可以睇到腳下西貢村落嘅景色，仲可以飽覽180度無敵大海景，啱哂行山想要有「大地盡在我腳下」feel 嘅朋友啦。就係因為對住個大海，呢度一年四季都會吹住東風，所以天氣好嘅時候，好大機會見到有人玩滑翔傘架！
昂平最正嘅地方係咩？就係唔難行上山！由馬鞍山恆安邨起步，唔洗兩小時就可以上到山 (亦可以坐村巴或的士skip左一大段路程，到馬鞍山村先起步，不過都係環保啲親自行上山先有成功感架嘛！)；路程亦冇難行嘅位，好適合初次行山者。回程時沿原路落山，非常簡單直接。鐘意挑戰自己嘅朋友亦可以登埋上鄰近嘅大金鐘山頂，雖然係難行啲，要手腳並用，但係可以喺高點回望番昂平高原，你就會覺得一切都值得！(不過大家要量力而為喔)
喺昂平可能會見到好多牛牛，相信佢地係以前附近村民養嘅牛嘅後代。以前村民為左避免海盗騷擾，通常都喺山上住，並以農業維生，所以養左唔少牛。自從村民一個個搬走，就留低左牛牛嘅後代。牛牛到而家都過住簡單樸素嘅生活，只要大家唔打擾佢地食草，人類同大自然都可以好融洽咁一齊生活。
1. 由馬鞍山恆安邨起步，沿馬鞍山村路步行45分鐘到達郊野公園管理站
2. 由郊野公園管理站沿馬鞍山郊遊徑上山到達昂平高原
3. 可以沿路折返，或經茅坪古道往下行到富安花園
詳細路線參考：http://www.lcsd.gov.hk/en/healthy/hiking/common/hiking/doc/A5.pdf