由元朗A出口，過左條馬路，一直向前踩，踩向博愛醫院既方向，過左醫院後就會發現有條河堤，旁邊有條陰暗小徑。繼續沿著排水繞道直踩。依條小徑沿路都種滿晒樹，踩住單車穿插在大樹之間真係透心涼嫁。沿住指示牌一直繼續踩就可以啦。沿途可以見到濕地，仲有黑臉琵鷺同其他水鳥，到時就要注意唔好咁大聲喧嘩，如果唔係就會嚇親雀鳥啦。
踩到累累地？中間會有間老婆婆開既豆腐花店，坐係店入面，放眼仲有河邊既靚景，一邊食豆腐花，一邊休息，一邊吹下風睇下景，真係好正嫁。婆婆仲有自己既船仔，佢平時會扒船仔到河中央喂佢養既鴨仔。有興趣可以問下婆婆借隻船仔黎扒下，她都好樂意借比客人扒下船仔嫁。不過小編就有啲怕水所以無試到，見到其他食客扒得咁開心都好羨慕，可惜呢～
食飽肚仔就繼續踩啦，踩多30分鐘左右就會到南生圍嫁啦。WOW～一入南生圍就會見到一大片草地，周圍都係綠色，咁靚既環境成為左唔少電影、電視劇既拍攝聖地。南生圍入面都有唔少白千層嫁，白千層有好多層樹皮，一層層既老樹皮留在樹上面，就可以形成保護層啦，不過平時係市區就比較難見到白千層，因為種係市區既時候，汽車既廢氣好容易將白千層既樹皮染黑，令人覺得有唔乾淨既感覺，所以係市區都比較難見到白千層嫁。
南生圍入面都有一條好出名既橋，因為有唔少人都會到南生圍影婚紗相，所以依條木橋又有「婚紗橋」之稱。不過早前有新聞報道過有電視台將橋上耐濕耐壓既木材拆走，換上外表光鮮既木材進行拍攝。但完成拍攝後就將原本既木頭丟棄離去，令橋耐久度大減，再加上有人係橋上踩滑板跳動，進一步令木橋損壞。最近村民復修木橋，先令木橋重見天日。我地有機會到南生圍既話要注意愛惜木橋，唔好白費村民心機，咁先可以令更多人都可以同木橋合照，欣賞南生圍依個咁靚既地方！
南生圍一大片草地，唔少地產商都睇中南生圍依塊地，最近更有發展商銳意發展南生圍，興建豪宅及高爾夫球場。但計劃帶黎既經濟得益只係惠及一班財團同地主，一班少數既人。南生圍係香港人共同既後花園，作為城市綠土，係都市人舒展身心既郊遊聖地。元朗已經失去左菜園村，如果連南生圍都失去，依個城市只會愈黎愈可悲。
