塱原濕地

今次我地為大家介紹係一條較輕鬆，適合短途遊玩嘅線— 塱原濕地。塱原濕地位於新界東北，毗鄰上水以西一帶，區內以農地為主，所以吸引約210種候鳥到訪，係重要嘅具生態價值地點。2000年港鐵興建落馬洲支綫，計劃以高架鐵路形式經過塱原一帶，幸好最後被環保團體強烈反對之下，採用地底隧道方案，塱原亦得以保護，未喺發展巨輪之下被破壞。十五年過去，稻香依舊、風貌仍在，但逐漸被遺忘。城市繁華背後仍然有塱原呢個充滿鄉郊情懷嘅地方，絕對值得城市人去一個短途旅遊，認識同欣賞碩果僅存嘅綠草碧水同埋小動物。塱原裏面大多數都係農地，其中稻米田為濕田，好彩的話可以見到好多鳥類停留。喺田邊小徑漫步，欣賞下認真嘅農夫工作、影下相、聽下鳥聲，反思一下人類同自然間嘅關係，不失為一個怡人嘅散心之地。