一入到鯉魚門就有一大片海啦，有好多船停泊喺岸邊，岸邊有啲棚屋。小小嘅海灣後面有一幢幢新落成的公屋、居屋及私人樓宇，好似擠喺市區間嘅一個小天地。抬起頭唔單止有藍天白雲，仲有靚靚嘅旗海，屋頂掛滿晒鯉魚形狀嘅旗幟。一直向前行就開始走入三家村啦，海水味都愈嚟愈強烈，聞到一陣陣海水咸咸濕濕的味道，原來係因為有大大小小嘅海鮮酒家，周圍又有好生猛嘅海鮮，唔怪得聞到陣咁新鮮嘅海鮮味啦！食番豐富嘅海鮮大餐都可以話係嚟三家村嘅指定動作。
唔想食海鮮？無問題，一直keep going啦。三家村都有啲專買傳統手工餅嘅店嫁。小編就係間勝園蛋卷買左包叮叮糖，香港叮叮糖真係買少見少啦，簡直就係童年回憶。婆婆仲好細心幫我開包糖，婆婆：「啊妹，包糖唔開咁大個開口，如果唔係好易跌晒啲糖出嚟。」問番婆婆先知原來間店係婆婆一家人一齊開，所以餅都係婆婆同佢屋企人一齊整，咁多款式嘅餅都識整，上一輩嘅手藝真利害！行多陣又有間瑞香園餅家，見到一堆新鮮出爐嘅老婆餅，忍唔住食番個先，嘩！拎上手仲係熱辣辣嫁。食落去唔係平時食開好甜個種味道，甜度岩岩好，重點係個餅皮超級薄，好鬆化，入面又好軟。原來所以餅都係人手制作，店員仲話: 「我地自己店有焗爐焗，每日新鮮出爐。」唔怪得離遠都聞到熱辣辣、香噴噴嘅味道啦！（因為太好食小編自己一個人買左三個嚟食yeah）
最後行到盡頭應該就會見到鯉魚門燈塔啦。有唔少伯伯都伯係度釣下魚，吹下海風。岸邊有幾排破爛嘅小棚屋都好值得影底。鯉魚門係其中一個見證香港歷史嘅地方，在三家村左穿右插穿過一條條嘅通道，會發現一間貌似係荒廢左嘅學校，地下就畫左跳飛機嘅圖案。以前嘅香港較窮困，電子科技都唔流行，小朋友就係靠地上幾個簡單嘅數字格娛樂。隨著時代嘅轉變小朋友嘅玩具都已經改變，比起跳飛機依個年代嘅小朋友更加鐘意玩電子產品，玩具都變得愈來愈複雜，看住開始褪色嘅跳飛機，唔知道上一代童年嘅回憶會唔會亦隨著褪色的跳飛機而消失呢？
