雞公嶺

今次帶喜歡挑戰自己嘅大家上山，睇下金黃嘅雞公嶺同埋新界村落魚塘。講起行山，大部分人都會諗起獅子山、龍脊等等嘅熱門行山徑；但如果想遠離人潮、挑戰自己，上山尋找香港新界鮮為人知嘅一面嘅話，雞公嶺絕對係首選。雞公嶺位於新界西北，屬於林村郊野公園範圍內，兩邊主要上山入口位於元朗同粉嶺。山腳四面皆為平地，好天的話，上到最高585米嘅羅天頂可以盡瞰錦田、上水、元朗、米埔同埋新田平原，欣賞好靚嘅田野魚塘。高374米嘅副峰面向西北，四周都冇遮擋，係賞日落嘅最佳地點之一。而雞公嶺本身地勢險要，一峰接一峰，嶺上草叢冬天金黃、夏天翠綠，可以影靚相嘅位置好多，絕無悶嘅路段。