嘉頓山高90米，原本叫喃嘸山。傳說喃嘸山呢個名同李鄭屋漢墓有關。至於嘉頓山就係深水埗居民既俗稱，因為山丘好近深水埗既地標——嘉頓麵包廠。
原來當啟德機場仲運作緊既時候，嘉頓山上面有飛機訊號燈塔。1998年後，訊號塔隨住啟德機場關閉而拆走。從此之後，嘉頓山變成深水埗居民既晨運徑，特別受長者歡迎。
相信大家都聽過康文署禁止大眾係公園進行唔同活動，你屋企樓下個公園，大部分都會豎起個告示牌，指明唔可以公園內放狗、玩滑板等等。(正如之前球場唔俾進行其他球類活動～) 原因係呢啲公園受政府規管；政府可能為左方便管理、減低特發事故發生嘅風險，往往犧牲左市民使用公共空間嘅權利同埋便利。如果想擺脫呢啲限制，就要靠大家開拓非主流非正式公共空間喇！之前西環貨物裝卸區嘅天空之鏡就係一個好例子，雖然朝早係繁忙嘅運輸重地，但傍晚就搖身一變，成為散步拍拖勝地；可惜政府因為安全理由要加設圍欄，呢個空間就失去左自由。
深水埗嘉頓山睇風景嘅地方同天空之鏡一樣，冇康文署嘅配套、冇遊客設施、冇扶手、冇欄杆；但正正就係因為咁，我地先至可以好無拘無束咁遊玩、好自由地演譯呢個真真正正屬於所有人嘅公共空間。可以讓大家留下美好回憶嘅地方唔一能要有完善嘅配套，反而自己主動去探索、發揮創意去利用一啲非正式化嘅公共空間，遊程一定會比去傳統嘅景點難忘同更有得着。只要我地每個人都自律，尊重當地現有環境同注意安全，邊度都可以係旅遊景點啦！
想知多啲關於香港公共空間，可以瀏覽 拓展公共空間 Hong Kong Public Space Initiative 專頁！
