%2520(2).jpeg)
今次筆者嘅推薦路線係由石板街做起點，卑利街為終點，喺蘇豪區遊走一圈。
石板街
由香港站Ｃ出口向右直行，就會見到又稱為石板街嘅砵典乍街。石板街嘅暱稱係源自於呢度嘅石級。大家細心留意，就會發現呢度嘅石級一高一低咁，原來係為左達到防滑作用而刻意設計！
大館
沿住石板街往上行，睇完街道兩邊千奇百趣嘅商品，現稱為大館嘅古蹟藝術館就近在眼前。呢座稱為大館嘅藝術館，原身為中區警署建築群，由1841年就開始見證住香港歷史嘅變遷，同執法制度嘅不斷完善。其實，大館又係以前警務人員同市民對呢個建築群嘅簡稱，對建築群進行活化嘅公司為表尊重，就繼續沿用呢個名作為活化後古蹟藝術館嘅名。
由警察總部大樓門口入去開始參觀，唔單止可以認識到呢個建築群嘅整段歷史，仲可以了解到當時囚犯嘅日常生活、警察考核條件等等。喺進入檢閱廣場前，大家仲可以見到當時要成為警察，需要達到嘅水平，筆者就應該無辦法考到喇，唔知大家又達唔達到要求呢？
%2520(2).jpeg)
嘉咸街
參觀完大館，喺紫荊樓閘離開，就可以沿路返去警察總部大樓嘅門口。繼續向前行，到馬路交匯處，就會發現中環其中兩幅壁畫近在眼前！嘉咸街嘅壁畫，要兩幅都睇到，就考驗大家嘅眼力！一幅以藍色為背景，繪畫樓景嘅壁畫，就喺嘉咸街嘅街口，完全唔難揾到。雖然而家壁畫已經有褪色跡象，但影相就更覺陳舊感覺，老香港味濃郁！至於另一幅繪畫香港夜景嘅壁畫，就隱藏喺小巷之中。沿路向上行少少，就會發現原來仲有一幅壁畫喺小巷嘅樓梯邊，唔睇清楚真係好易錯過！不過，因為兩幅壁畫都相當近馬路邊，大家影相嘅時候都要注意周圍，留意車輛駛過啊！
%2520(2).jpeg)
.jpeg)
卑利街
影完嘉咸街壁畫，當然唔可以錯過附近嘅卑利街壁畫喇！由嘉咸街街口向右行，就會到達卑利街。喺卑利街街口，就可以見到一個少女同大嘴鳥嘅「合照」！影完文青相之後，仲可以去幫襯下側邊嘅蔗汁舖！呢間蔗汁舖開業至今，已經有超過70年歷史，除左招牌蔗汁，仲有龜苓膏、涼茶等等。大熱天時，大家影完相不妨順便買返杯蔗汁飲，解渴消暑！
%2520(2).jpeg)
其實，除左今次介紹嘅壁畫之外，中環仲有好多鮮為人知嘅壁畫等緊大家拎埋相機去影相！就好似卑利街，除左街口之外，大家願意花少少腳力向上行嘅話，短短路程仲可以揾到唔少有趣、懷舊嘅壁畫㗎！有時得意又富藝術氛圍嘅打咭點就喺我哋周圍，就差有無耐心去慢慢尋找！