.jpeg)
相信大家都試過去郊野公園燒烤，但搭公共交通工具嘅情況下，要自己帶齊燒烤用品同食物入去，難免會麻煩同不便。原來，屯門碼頭仲有一個叫蝴蝶灣嘅地方，唔單止可以燒烤，喺黃昏時分去嘅話，仲可以欣賞到超靚日落！
蝴蝶灣
蝴蝶灣主要有兩個入口，一個連接住海濱花園，而另一個就喺馬術學校對面。如果係想黃昏時分先到，欣賞完日落先燒烤嘅朋友，筆者就推薦大家由海濱花園入去喇！蝴蝶灣除咗有燒烤場同多個設施，包括排球場、緩跑徑之外，最吸引嘅就係可以睇到日落嘅沙灘！雖然燒烤場同沙灘之間嘅距離好近，食飽就可以直接落去玩水、影相，不過要睇到至靚嘅日落，筆者就推薦大家去另一個隱藏區域欣賞喇！
.jpeg)
日落與沙灘
筆者所以推薦大家由海濱花園入蝴蝶灣，除咗可以沿路欣賞海景，另一個原因就係要到呢個隱藏區睇日落！沿路直行，喺涼亭嘅側邊會發現一條樓梯，原來呢度有一個觀音廟。落樓梯之後，會發現除左通往觀音廟嘅路，仲有一條沿海邊繞半周嘅小路，行前少少就會發現，同沙灘互相映襯嘅日落就喺眼前！睇住陽光映射落粼粼水波上，真係特別寫意！
.jpeg)
燒烤場與燒烤用品
至於想要早啲嚟燒烤嘅朋友，就可以先去燒烤場燒烤同沙灘玩水，之後先再去影日落喇！雖然蝴蝶灣區內只有一間小店賣飲料同小食，但其實喺附近都有唔少嘅水上用品店同燒烤用品店，畀大家買到所需用品！沿散步徑行去美樂花園側邊嘅出入口，轉右就會見到販賣水上用品嘅店舖。再行過少少，就會見到燒烤用品店喇！如果想去其他地方買燒烤食品，都可以考慮去對面嘅蝴蝶街市或蝴蝶邨商場內嘅超市購買！
.jpeg)
美樂花園
美樂花園對出街道除左用品店之外，仲有好多餐廳任君選擇！想淨係下午燒烤，夜晚食飯嘅朋友，不妨可以嚟呢度試下唔同國家、地區既料理！除左餐廳，呢度仲有兩間甜品店，分別主打港式同西式甜品，無論想食咩都絕對滿足到大家嘅願望！
.jpeg)
屯門由於遠離市區，成日都會為住喺其他地區嘅市民帶嚟好多唔同嘅想像。屯門雖然已經比以往發達，好多新時代產物相繼出現，但都仍然保留住唔少原始風貌畀大家觀賞。但係，筆者去蝴蝶灣嘅時候，竟發現沙灘上有唔少遊客留低嘅垃圾，包括紙包飲品、塑膠等。自己嘅垃圾自己帶走，唔單止係我哋對大自然同居民嘅尊重，更係對個人道德嘅維護。
.jpeg)
雖然大部分人同屯門都有地區上嘅差距，但咁唔代表我哋要對唔熟悉嘅地方嘅美好進行隔離。大家不妨趁假日，跟隨筆者嘅步伐，一齊深入探索屯門呢個不一樣嘅香港風貌！