炎炎夏日，相信好多人都急不及待出海同陽光玩遊戲。香港夏天嘅太陽咁熾熱，當紫外線指數超過三就更加要做足防曬措施避免曬傷。
市面上好多防曬產品都係用「化學防曬」嘅原理，透過 oxybenzone 同octinoxate 等成分將紫外光阻擋同過濾，而達致防曬效果。但其實這些化學物除咗對海洋生物同珊瑚有害、會加劇珊瑚白化外，亦有可能同皮膚產生過敏反應。
小編建議選用以「物理防曬」為原理嘅產品，例如係有 zinc oxide(ZnO) 同 titanium dioxide (TiO2) 嘅防曬。這類型防曬透過反射紫外線，阻擋紫外線對皮膚嘅傷害，以達至防曬效果。除咗唔會造成珊瑚白化外，物理防曬無咁容易被皮膚吸收，比較適合敏感肌膚使用。只要同樣揀選SPF 30+ 以上嘅產品，物理防曬都一樣咁有效保護皮膚。
除咗睇成份之外，大家亦可以留意一下市面上標榜海洋友善 (Marinefriendly / Reef Safe) 嘅防曬產品，通常都會係使用物理防曬原理。
當然啦，其實最天然嘅防曬方法就係着長袖衫褲同戴帽，直接阻擋紫外光同皮膚嘅接觸；小編平時玩獨木舟都會揀着長袖衫褲！希望大家出海嘅同時，都可以為保護海洋生物出一分力，減少使用對海洋生物有害嘅防曬產品。
