近年嚟行山同露營愈趨普及，相信唔少香港人同小編一樣，熱衷探索香港嘅後花園，發掘這小城石屎森林外嘅另一面。小編決定趁機會向大家介紹 ‘Leave No Trace’ (山野無痕) 嘅概念。‘Leave No Trace’ 沿於美國, 當時到野外行山同露營嘅遊人漸多, 對環境造成破壞; 有見及此，當局開始提倡山野無痕嘅概念， 希望遊人享受郊遊時亦都會尊重同保護大自然。‘Leave No Trace’ 有七大原則，了解咗之後， 希望大家享受本地風光嘅同時, 亦會一齊守護這片土地。
一：出發前充份計劃及準備 (Plan Ahead and Prepare)
事前準備絕對唔係上網睇幾個行山posts咁簡單!出發前應計劃好路線、預計要行幾耐、以及有無退出點等；同埋因應天氣預報而穿著同帶備適當裝備。小編鼓勵大家儘量避免假日去「打卡熱點」，亦可以早啲出發,避開人潮，行得舒服啲唔使同人迫之餘，都可以減低對環境嘅影響。另外，去露營前可以先計好食物嘅份量，係屋企拆咗包裝，再用食物盒等重新包裝拎去營地。咁樣做除咗可以減少浪費食物之外，亦可以避免係營地先拆包裝而製造大量垃圾。
二：在正規山徑和營地上行走及紮營 (Travel and Camp on Durable Surfaces)
好多時係山徑樓梯嘅隔離都會出現一條由前人開闢嘅斜路，雖然小編都明白有部分石屎樓梯的確唔好行，但請儘量使用原有嘅山徑，沿翻樓梯行。如果個個都行捷徑嘅話，條山路就會愈嚟愈闊，仲會搞到寸草不生，一落雨就好易積水同沖走曬啲泥沙。如果真係無山徑的話，就應該踩係堅固嘅地面上，例如係石頭或者乾草。露營方面，大家可以參考翻郊野公園嘅41個漁護處指定露營地點，唔好係沙灘或者燒烤場到違規露營喇。
三：妥善棄置廢物 (Dispose of Waste Properly)
相信大家對「自己垃圾，自己帶走」都唔會陌生。香港大部分郊野公園內嘅垃圾桶都已經被移除，但即使郊外有垃圾桶，其實都係隔一段時間先會有工人或義工清理，逐袋垃圾沿山徑搬落山；將垃圾帶翻市區先棄置唔單止減低對環境嘅污染，同時可以減輕清潔工人嘅負擔。
好多人以為蕉皮同蘋果芯等廚餘可以自然分解，就隨手丢棄係野外；但其實一塊蕉皮要幾個月嘅時間先會分解，過程中有可能引嚟野生動物嚟覓食，所以都係唔好隨地扔，袋住佢拎翻市區垃圾桶先棄置。
小編建議大家帶一個垃圾袋，將廢物裝好再帶翻市區先回收或棄置。當然啦，最好嘅方法都係減少製造垃圾，例如自己帶備水樽善用加水站，已經可以慳翻幾個膠樽。千其千其唔好亂拋垃圾，尤其係口罩！
四：保持原有風貌 (Leave what You Find)
簡單嚟講就係「眼看手勿動」。請將郊遊時見到嘅一草一木、貝殼同石頭等都留係原地,唔好將佢地拎走,影張相留念都一樣得啫。香港鄉郊中有唔少戰前建築、碉堡等古蹟,為咗保護遺跡,請唔好用手觸摸,離遠欣賞就夠喇。
五：減低用火對環境的影響 (Minimize Campfire Impacts)
香港郊野公園範圍內只有燒烤場同營地可以生火,小編亦建議大家儘可能係燒烤爐入面生火,減低對土地嘅影響。記得使用後要撲滅火種,避免死灰復燃引發山火。
六：尊重野生動物 (Respect Wildlife)
請緊記山野係野生動物嘅主場,係郊外遇到野生動物例如係馬騮同牛隻時唔好大驚少怪,同佢地保持距離唔好打擾佢地。另外,記得千其唔好餵飼野生動物,咁樣做會令佢地失去覓食本能,亦可能令動物誤將行山人士當成食物來源。順帶一提,最好就將食物放係食物盒同背囊入面妥善保存，避免吸引馬騮過嚟搶嘢食。
七：顧及其他遊人 (Be Considerate of Other Visitors)
大家到郊外都係想遠離鬧市煩囂，享受一下自然風光;將心彼己，行山時請將聲浪收細，避免大聲喧嘩同用喇叭聽歌。另外，行得比較慢或者停低休息時請企埋一邊，讓翻條路出嚟俾其他人行。
